Yvirskipað gongd

Eftir tilmæli frá barnaverndartænastu tekur Føroya Kærustovnur avgerð, um barn skal verða sett heiman.

Barnaverndartænastan ger ætlan um fyriskipanina at seta barnið heiman. Hetta verður gjørt út frá støðuni hjá barninum.

Barnaverndartænastan letur Fosturforeldraskipanini avgerðina hjá Føroya Kærustovni saman við ætlanini, sum skal vera støðið fyri tíðini, ið barnið er hjá fosturfamiljuni.

Tá tit taka eitt barn til fosturs ella í umlætting, játta tit samstundis at fylgja hesi skrivligu ætlanini. Skrivliga ætlanin verður eftirmett í sambandi við uppfylgjan í málinum.

Fosturforeldraskipanin leitar eftir hóskandi fosturfamilju. Tveir møguleikar eru:

1. Barnavendartænastan ger tilmæli um ávís fólk innan næstringar ella netverk. Hesi senda Fosturforeldraskipanini umsókn um at gerast fosturforeldur.

2. Fosturforeldraskipanin kannar møguleikar millum tøk fosturforeldur í skipanini.

Fundur í Fosturforeldraskipanini (í Barnaverndarstovuni) saman við fosturforeldrum og barnaverndartænastuni, har fosturforeldur fáa meira kunning um uppgávuna.

Á vitjan í fosturheiminum luttaka Fosturforeldraskipanin, barnaverndartænastan, foreldur og fosturforeldur.

Barnið vitjar fosturheimið saman við foreldrum og barnaverndartænastuni. Vil annar av pørtunum hava Fosturforeldraskipanina við, luttekur hon.

Innleiðslan fer fram eftir tørvinum hjá barninum. Ofta verður vitjað nakrar ferðir, áðrenn barnið svevur í fosturheiminum. Soleiðis er eisini í sambandi við umlætting.

Barnaverndartænastan hevur hálvárligt eftirlit, har hon vitjar fosturheimið. Sosialráðgevin hevur samrøðu við barnið í einrúmi. Eisini hevur sosialráðgevin samrøðu við fosturforeldrini. Eisini Fosturforeldraskipanin vitjar fosturheimið árliga.